本身都唔想再因為呢個土共嘍囉、傀儡校長再說三道四，但係見到佢特登send email 俾應屆畢業生個陣，真係火都嚟埋。
你自己都識講，大學係崇尚學術自由同言論自由嘅地方。但係你咁樣發公開信譴責學生嘅行為，同公開批鬥有咩分別？學生多次想向你哋班權貴表達聲音，你哋視而不見，仲對學生喊打喊殺。而家畢業啦，仲有守護香港、守護言論自由嘅心嘅畢業生，喺直接見到林鄭嘅地方發聲，佢哋只係履行緊應有嘅公民權益，仲有言論自由。你不但肆意阻止，仲要話人哋嘅行為令人蒙羞。呢啲係乜嘢道理？你何嘗有尊重過言論自由同學術自由？
你何嘗唔係利用畢業禮，粗鄙批鬥美帝擦北京鞋？嘩，擦北京鞋嗰陣你就口舌便給，鸚鵡學舌咁歌頌，一講關於畢業生嘅前途問題就語焉不詳。你發表講辭，理應祝福畢業生前程錦鏽，為社會作出努力。點知你份稿對呢部份輕描淡寫，有大篇篇幅都喺度煽動學生支持中共，反抗美帝嘅什麼「粗暴行為」，我夠覺得你啲言辭好暴力，仲要好唔尊重在場嘅學生同家長。究竟你上台係為祝福學生，定係為政治獻媚？你自己心照啦。
請你認清事實，根本係你令到學校一年比一年變得封閉羞恥。利用不公正選舉攞校長呢個位不在話下，仲要同港共政府朋比為奸，肆意箝制學生嘅自由同權利，對政府委任土共份子做校董完全鵪鶉，唔睇唔知以為你代表共產黨喺度管治大學。究竟邊個令到嶺南大學蒙上紅色污點？究竟邊個令到大學蒙羞？
「為真小人爭取社會地位，不讓偽君子們霸佔全世界。」——黃霑