香港人真係好「關心」政治。其實通識試卷過去兩年都冇乜人理，因為冇政治題，啲傳媒求其報吓，坊間也冇乜人討論。好喇，今年又見政治題，即刻好似發現新大陸咁，見到記者係咁搵老師回應，呢科又立即煲熱返。
但可悲嘅係，主流香港人的這一種「關心」，只係關心政治喺唔喺身邊出現，佢哋一見到政治喺身邊出現，就會好關心，但如果見唔到，就漠不關心——呢一種「關心」其實就係梁美芬之流代表和鼓吹嘅態度。
但你見唔見到都好，關唔關心都好，政治都喺你身邊。政治就好似大氣嘅細菌病毒塵埃懸浮粒子，你平時肉眼見唔到，但一直都存在。然後有一日你喺放大鏡下發現空氣中咁多塵，先好驚訝大叫「乜空氣裏面咁多塵架」。係，空氣就係咁多塵，有空氣就會有塵，就會有細菌病毒，咁你係咪知道咗後就唔呼吸？
政治一樣，你扮無知裝睡當見唔到，但政治總喺你周圍。學生就不涉政治？越來越多大陸學生來考，係咪政治？坊間已有專為大陸生嘅DSE 補習課程(特別係通識)，呢啲係咪政治？幼稚園生無端端要學唱國歌，呢啲係咪政治？
政治總是無色無形咁影響緊我哋，唔係大家睇唔到就冇，唔係通識科出條政治題，大家先如夢初醒咁大叫：「嘩，有政治呀，好驚呀，我唔要見到呀！」之後繼續自以為喺無菌室裏生活。
希望所有通識考生對政治嘅「關心」，並唔係這一種。
題為編輯所擬
版權: