政府為咗令創新及科技局喺財政預算案公佈前通過，喺財委會抽起咗「資訊科技增潤計劃」同「推行第四個資訊科技教育策略」兩個項目；早前又喺泛民佔多嘅立法會工務小組，抽起一堆有關特殊教育同興建新校等議案，令教育界葉建源怒問「為何每次都向教育界開刀！」事情簡單不過，因為大家好忙。
香港教師，一向好忙的：返工、放工、改簿、搞文件、應付自評、外評、處理升學、OLE、SLP、OEA、SBA乜乜乜，做餐懵。咁忙，仲邊有時間理立法會做緊咩？仲未計，去旅行、去食、去玩、湊仔、影屋企仔女啲相放上網呃LIKE，之類。中古世紀嘅奴隸奴工，都因為要覓食求生，而無暇去思考權利呀。或曰，有志於教，「我有教無類！」、「我係教書的，唔係搞政治！」，所以春風化雨，笑容和煦，然後就真係只教人了。忙於樹人，反倒無視，中毒的土壤，決種不出茁壯的大樹。
過去兩個月，係身邊同工史無前例最關心立法會事務嘅時間。原因唔係佔領、唔係鳩嗚、唔係示威區、三堆一爐，而係睇財務委員會能否通過公務員加薪方案。人為錢財，無可厚非。只係大事大非視之不見，卻只關心眼前加薪，笑死人咩。
社會大事，最多六四七一行禮如儀買贖罪券，然後「太陽照常升起」。即使殺到埋身嘅教育議題，某教育團體成日搞集會，但又邊個得閒理。休假乃人之常情，陪伴家庭也是必須，畢竟殺校唔關Band 1事，關事嘅Band 3又驚搞事死快啲；幼稚園一筆過撥款反正同我中小學無關；特殊教育支援又何曾關我主流學校事；裁合約就影響唔到長約，合約又怕槍打出頭鳥乖乖不作聲。結果大家有時間不如打麻雀或陪仔女練小學面試好過。當一眼回頭，就好似德國神父，發現猶太人、共產黨，早已被殺盡了。既然如此，政府唔搵教育界開刀又搵邊個？
「永遠叫不醒裝睡的人」，更唔會叫得醒裝死的人。人為刀俎，我為魚肉。原因無他，就係徐志摩話齋：「在康河的柔波裡，我甘心做一條水魚！」