筆者剛離開中學的教學崗位，走入大學大觀園，在不同境地繼續重遇昔日面孔。數數手指，自己第一批新學制、12年中六畢業的學生今年就要大學畢業，慶幸還有不少在學的 year 3 同 year 2 學生。借此一角，祝福自己最後一批 DSE學生今年順利入大學做新生兒，咁就有更多新飯腳啦！
每次有舊生相約午膳，心存感恩，彷似感到一種肯定：至少當年我教得唔太差(?)，又或者我當年都似個老師、對佢應該唔太差(?)
在他們身上，我看到當年的自己，都曾經走過這麼一段青春。相見在大學 canteen，自己教的學生老早就要為 intern 同 exchange 籌謀，務求整靚CV。對比之下，自己當年有幾奇隨心──開心、輕鬆亦馬虎咁走過大學三年，真心膠相信自己已經脫離求學為分數，找些有趣的大通黎take，自製個唔太痛苦的minor，讀 minor仲上心過 major。只可惜，懵懂的我不知Hon唔食得但幾緊要。Exchange去唔到一年，去一個 sem? 去唔到一個 sem，咁 summer exchange啦。一路就去打工兼職，返工識到朋友又學習如何上手、何謂掌握，一種返學讀書領略唔到的感覺。隨緣皆有運，點點累積，成就自己的教師路。華麗轉身，離開前線又是另一些考量。
看著當年學生、今天朋友，快要轉化為全職打工仔。每次食飯都令我驚訝，令我想到記下有關他們的感受。唔，好似食餐飯都可以係田野考察，令我有啲反思。
每一個他們跟眾HR描述的唔聽話、無責任感唔同。佢地好努力，好希望進步，但又唔係好明、唔想接受舊有高壓個套。蝦蝦，整個社會的社教化係點塑造佢地出黎？到底我地的社會有幾盡力陪同學生成長，轉化佢地的經歷成為他們個人的得著？
例如：有幾多人會聆聽佢地點走過 DSE? 由準備到放榜、從雄心跌入沮喪? 何解師長認為自己的選科期望過高? 佢地自己入 Asso 入大學又好，回望不遠不近的過去，除咗脫苦海，仲有咩感覺？又有幾多人明白大學生努力多年，年年 Course course 的同學不同，一堆 hi bye frd子係會原來帶來寂寞同凍……
傾談之間，我感到要自由又渴望被提點的靈魂，看到一位位摩拳擦掌、靜待一展身手的初生之犢──愛表達、要面子但又想行先一步要變得成熟、老練。或者，佢地就正係要提醒我：喂，唔好做 old seafood呀！繼續保持彈性、常有熱誠，世界那麼大嘛！
離開課室，雖然我的角色不再是教師，但我願意陪伴每個朋友成長。我的分享都唔知有咩用，或者根本上要問：仲有無用? 畢竟我的經驗已經係歷史，很個人。但我有一餐飯/一餐茶的時間，有對耳聆聽，有把口亂講。We don't need a title to do something if you try hard enough. Do what we should do.
收筆之時，感激現任的上司的包容與體諒，給予我的自由及信任，令我行有餘力做想做的事，特此將學生的祝願迴向祝福他們。
p.s. 一直以來，工作遇到的好伙伴，感謝每一個您！祝 安好！